মিছা কোৱাৰ প্ৰতিযোগিতা

মিছা কোৱাৰ প্ৰতিযোগিতা

এবাৰ এজন ৰজাই মিছা কথা কোৱাৰ প্ৰতিযোগিতা পাতিলে আৰু ঘোষণা কৰিলে যে যিয়ে তেওঁক হেপাঁহ পলুৱাই মিছা কথা কব পাৰে তেওঁক দহ টেকেলি সোণৰ মুদ্ৰা দিয়া হব । সমগ্ৰ ৰাজ্যতে কথাটো ঘোষণা কৰি দিলে ।

ৰজাই নিৰ্দিষ্ট কৰি দিয়া দিনত মিছা কথা কোৱা প্ৰতিযোগিতাৰ প্ৰতিযোগীৰে ৰাজ সভা ভৰি গ’ল । বিভিন্ন জনে বিভিন্ন ধৰণে ৰজাক মিছা কথা কবলৈ ধৰিলে ।

কোনোবাই কৈছিল যে তেওঁৰ হেনো বুঢ়ীমাকে এটা হাতী পোৱালি জন্ম দিছিল । কোনোবাই কৈছিল তেওঁৰ জন্মৰ সময়ত মাজ নিশা সুৰ্যটো ওলাইছিল । কোনোবাই কৈছিল তেওঁৰ ককাকে পানীত জুই জ্বলাব পাৰিছিল । এনেদৰে নানাজনে নানান মিছা কথাৰে ৰজাক সন্তুষ্ট কৰিবলৈ চেষ্টা কৰিলে । কিন্তু কোনো এজনৰ কথাটেই ৰজা সন্তুষ্ট নহ’ল ।

অৱশেষত এজন ছালছিগা ভিকহু থৰক বৰককৈ ৰাজসভালৈ আহিল । ৰজাৰ সন্মুখলৈ গৈ কলে , ‘মহাৰাজ, আপুনি যদি অনুমতি দিয়ে এই অভাজনেও এবাৰ চেষ্টা কৰি চাব বিচাৰোঁ ।’

birbal

ভিকহুৰ কথা শুনি ৰজাই ঢেক ঢেককৈ হাঁহিলে আৰু কলে ,’ বৰ বৰ পণ্ডিতসকলেই বিফল হৈ পোতাশাললৈ গ’ল । তইনো কি কৰিবি ? বাৰু কব খুজিছা যদি ক সোনকালে । ‘

ৰজাক সেৱা জনাই ভিক্ষাৰীটোৱে আৰম্ভ কৰিলে , ‘মহাৰাজ, আগৰ জনমত মই আছিলো এজন ৰজা আৰু আপুনি আছিল মোৰ ৰাজ্যৰেই এজন ছালছিগা ভিকহু । তেতিয়াই আপুনি মোৰ পৰা দহ টেকেলি সোণৰ মুদ্ৰা ধাৰে লৈছিল আৰু কৈছিল যে সেই জনমত নোৱাৰিলেও পিছৰ জনমত পৰিশোধ কৰিব । এতিয়া মোক সেই দহ টেকেলি সোণৰ মূদ্ৰা পৰিশোধ কৰক । ‘

ভিক্ষাৰীৰ কথাত ৰজাৰ খঙে চুলিৰ আগ পালে আৰু কলে , মিছা কথা । এয়া হবই নোৱাৰে । ‘ এই বুলি প্ৰহৰীক আদেশ দিলে তাক পোটাশালত দিবলৈ ।

তেতিয়া ভিক্ষাৰীজনে কলে মই যদি মিছা কৈছো তেনেহলে মোক দহ টেকেলি সোণ দি দিয়ক । আপুনিতো মিছা কথা কোৱাৰেই প্ৰতিযোগিতা পাতিছিল । আৰু যদি সচাঁ বুলি মানি লয় তেনেহলেও দি দিয়ক মোৰ প্ৰাপ্য সোণ খিনি ।

 

ৰজাই চিন্তা কৰি চালে – ভিক্ষাৰী জনেতো ঠিকেই কৈছে – মিছা বুলি কলেতো পাবই সচাঁ বুলি ধৰিলেও দহ টেকেলি সোণৰ মুদ্ৰা ভিক্ষাৰী জনেই পাব ।

ৰজাই ভিক্ষাৰী জনৰ বুদ্ধিক শলাগিলে আৰু তেখেতক দহ টেকেলি সোণৰ মুদ্ৰাৰে পুৰস্কৃত কৰি স-সন্মানে বিদায় দিলে ।

সাধুটোৰ পৰা আমি ইয়াকেই শিকিলো যে নিজকেই আটাইতকৈ জ্ঞানী বুলি ভাবি কাকো আমি অৱজ্ঞাৰ চকুৰে চোৱা উচিত নহয় ।
কন্দৰ্প কুমাৰ নাথ

এই বিষয়ে আনকো জনাওক..
Share on Facebook
Facebook
0Share on Google+
Google+
0Tweet about this on Twitter
Twitter
Share on LinkedIn
Linkedin
Email this to someone
email
Print this page
Print

এটা মন্তব্য দিয়ক

আপোনাৰ ই-মেইল আইডিটো প্ৰকাশ কৰা নহয়। * চিহ্ণ থকাকেইটা আৱশ্যকীয় তথ্য ।